18:46 Բացառիկ հարցազրույց Աղվան Պապիկյանի հետ | |
 Մեր կայքի "Թեժ գիծ ֆուտբոլի աշխարհից" բաժնի տաղանդաշատ թղթակից Մկրտիչ Կարապետյանը օրերս բացառիկ հարցազրույց ունեցել լեհական "Լոձ" ակումբի ֆուտբոլիստ Աղվան Պապիկյանի հետ: 18-ամյա տղան, ով ելույթներ է ունենում Հայաստանի երիտասարդական հավաքականի կազմում, մեր թղթակցի հետ խոսել է գրեթե ամեն ինչից: - Աղվա՛ն, ողջույն: Պատմի՛ր, խնդրում եմ, թե որտե՞ղ ես ծնվել և ինչպե՞ս ես հայտնվել Լեհաստանում: - Հայրս ու մայրս եկել էին Լեհաստան` աշխատելու: Նրանց` այստեղ տեղափոխվելուց 1 տարի անց ծնվել եմ ես, ու մինչ այժմ ապրում եմ այստեղ` Լեհաստանում: - Ընտանիքում պահե՞լ եք հայոց լեզուն ու հայկական ավանդույթները: - Այո՛: Ընտանիքում խոսում ենք հայերեն: Նաև նշում ենք տոները հայկական տոմարով: Լեհաստանում հայերը շատ են, և այդ առումով բավականին հեշտ է: - Եղբայրդ` Վոլոդյան, քեզ հետ նույնպես խաղում է "Լոձ" ակումբում: Ո՞ր դիրքերում եք խաղում: - Ես շատ եմ սիրում խաղալ ձախ կիսապաշտպանի դիրքում, բայց երբեմն խաղում եմ նաև աջ եզրում ու հարձակվողի թիկունքում: Եղբայրս խաղում է որպես կենտրոնական կիսապաշտպան և երբեմն որպես հետ քաշված հարձակվող: - Կա՞ն հայեր, որոնք աջակցում են ձեզ հանդիպումների ժամանակ: - Միշտ չէ, որ նրանք ներկա են լինում մեր խաղերին, բայց անընդհատ հետաքրքրվում են: Ի դեպ, երբեմն հայերով հավաքվում ենք ու ֆուտբոլ խաղում: - Դու վերջերս էլ հրավեր ես ստացել Հայաստանի ազգային հավաքականից և չես մերժել: Իսկ Լեհաստանի ազգային հավաքականից կա՞ր արդյոք հրավեր: - Կար, բայց ես շատ էի ուզում խաղալ Հայաստանի հավաքականի կազմում: Ինձ համար միշտ էլ Հայաստանն է առաջնահերթ եղել և միշտ էլ այդպես կլինի: - Ինչո՞վ ես զբաղվում ազատ ժամանակ: - Շատ եմ սիրում եղբորս հետ համակարգչով ֆուտբոլ` "PES" խաղալ: - Ի՞նչ կասես Հայաստանի ազգային հավաքականի մասին: - Հավաքականն ունի շատ լավ խաղացողներ և հիանալի մարզիչ: Մեր հավաքականն այժմ իրոք շատ ուժեղ է: - Ո՞ր տարիքից ես սկսել զբաղվել ֆուտբոլով: - Առաջին անգամ ֆուտբոլի պարապունքի եմ գնացել 7 տարեկանում: Բայց մինչև այդ էլ անընդհատ խաղում ու ապրում էի ֆուտբոլով: - Ո՞ր ակումբում կցանկանայիր խաղալ: - Մադրիդի "Ռեալում" կամ "Բարսելոնայում": Հարցազրույցը վարեց` ՄԿՐՏԻՉ ԿԱՐԱՊԵՏՅԱՆԸ   Լուսանկարների համար շնորհակալ ենք TotalFootball.am կայքին: | |
|
| |
| Total comments: 0 | |