Այս մրցաշրջանի 4-րդ "Սուպերկլասիկոն" Մադրիդի "Ռեալի" և կատալոնական "Բարսելոնայի" միջև կայանալու է "Չեմպիոնների լիգայի" 1/2 եզրափակիչ փուլի շրջանակներում վաղը` ապրիլի 27-ին, արդեն ավանդական դարձած 23.45 րոպեին: Ի՞նչ կարելի է սպասել այս խաղից: Ամեն դեպքում կարող ենք համոզված ասել, որ մեզ գրավիչ ու դիտարշան հանդիպում է սպասվում:

Մադրիդի "Ռեալի" պորտուգալացի գլխավոր մարզիչ Ժոզե Մոուրինյոն անշուշտ փորձելու է կրկին գտնել դեպի "Բարսելոնայի" դարպասը տանող ուղիները: Շաբաթ օրը "Լա լիգայում" "Վալենսիայի" հետ կայացած գեղեցիկ հանդիպումից հետո (խմբ. խաղն ավարտվել է մադրիդցիների հաղթանակով 6-3 հաշվով), Մոուրինյոն ունի խնդիրներ. մինչև մրցաշրջանի ավարտ այլևս խաղադաշտ դուրս չի գա հենակետային կիսապաշտպան գերմանացի Սամի Խեդիրան, ում կարող է փոխարինել թե Լասանա Դիարան, թե Գրաներոն, ովքեր լավ հանդիպում անցկացրին "Մեստալիայում": Ամենայն հավանականությամբ, Մոուրինյոն կձգտի այնպիսի տակտիկա ընտրել, որի արդյունքում խաղը կավարտվի հօգուտ "Ռեալի", քանի որ այլ տարբերակ ուղղակի գոյություն չունի. նույնիսկ ոչ-ոքին "Արքայական թիմի" համար կարող է որակվել որպես պարտություն:

"Բարսելոնան" վերջերս կայացած երկու "Սուպերկլասիկոներում" իսկական առաջատար հարձակվողի կարիք էր զգում. Գվարդիոլային հարկավոր է իրական Դավիդ Վիլյա, ով կարող է պատառ-պատառ անել մրցակցի պաշտպանությունը և մեկ ճշգրիտ հարվածով առաջ մղել իր թիմին: Հենց "Օսանսունայի" հետ խաղում մենք տեսանք այդ Վիլյային: Վերջին 11 խաղերում "կապտանռնագույնները" 8 հաղթանակ են տոնել, 2 ոչ-ոքի խաղացել ու մեկ պարտություն կրել: Այդ 8 հաղթանակների մեջ են մտնում Դոնեցկի "Շախտյորի” ու Լոնդոնի "Արսենալի” նկատմամբ տոնած վստահ ու ջախջախիչ հաղթանակները "Չեմպիոնների լիգայի" խաղարկության շրջանակներում: Իսկ ահա ոչ-ոքի կատալոնական թիմը խաղացել է միմիայն "Լա լիգայի" շրջանակներում` "Սևիլյայի" հետ "Սանչես Պիսխուանում" և Մադիրդի "Ռեալի" դեմ "Սանտիագո Բեռնաբեուում": Պեպ Գվարդիոլան ևս ունի խնդիրներ. շարքից դուրս են մնացել ձախ պաշտպաններ Ադրիանոն և Աբիդալը, կենտրոնական պաշտպան Գաբի Միլիտոն դեռ ամբողջությամբ չի ապաքինել: Ինչպես հայտարարել է Գվարդիոլան, "Բեռնաբեուում" իրենք ձգտելու են միմիայն հաղթանակի հասնել, քանի որ վերջին շրջանում "Ռեալի" հետ կայացած խաղերից հետո խաթարվել է իրենց հեղինակությունը:

Այս տարին իրոք "Ռեալ"-"Բարսելոնա" հակամարտության տարի կարելի է հռչակել. ընդամենը 3 շաբաթվա մեջ 4 հանդիպում: Նման բան չի եղել այս ակումբների հարյուրամյա պատմության ողջ ընթացքում: Անշուշտ, չի կարելի այս խաղը համեմատել "Շալկե"-"Մանչեսթեր Յունայթեդ" հանդիպման հետ, քանի որ "Սուպերկլասիկոն" մեկ այլ աշխարհ է, որտեղ ֆուտբոլասերն իրեն 7-րդ երկնքում է գտնվում: Իսկ "Ուեմբլի" տանող ճանապարհին իրար բախվող այս հսկաների մենամարտն ուղղակի անկարելի է բաց թողնել, նամանավանդ այն բանից հետո, երբ "Վալենսիայի" հետ հանդիպման ժամանակ թվաց, որ Կական ու Հիգայինն արդեն գերազանց մարզավիճակ են ձեռք բերել, իսկ "Օսանսունայի" հետ խաղում էլ վերադարձավ իսկական Վիլյան:

Հավանական կազմեր.

"Ռեալ Մադրիդ"` Կասիլյաս – Ռամոս, Կառվալյո, Ալբիոլ, Մասրելոն - Պեպե, Ալոնսո, Դիարա – դի Մարիա, Ռոնալդու, Օզիլ (4-1-2-2-1 հակագրոհային տակտիկա, որը կարող է հարձակումների ժամանակ փոփոխվել 4-1-2-3 սխեմայի)

"Բարսելոնա"` Վալդես – Ալվեշ, Պիկե, Պույոլ, Մաքսվել – Մասկերանո, Չավի, Ինյեստա – Պեդրո, Մեսսի, Վիլյա (4-1-2-3 տակտիկա, որը կարող է մամլիչ աշխատանք կատարել դաշտի յուրաքանչյուր հատվածի համար)

Միաջազգային բուքմեյքերական ընկերություններն այս հանդիպման համար սահմանել ենք հետևյալ գործակիցները. "Ռեալի" հաղթանակ` 2.60, "Բարսելոնայի"հաղթանակ` 2.60, խաղը կավարտվի ոչ-ոքի` 3.15 գործակից:

Մեր կանխատեսումը. եթե նայենք ընդամենը երկու շաբաթ առաջվա "Ռեալի" ու "Բարսելոնային", ապա ակնհայտ կլինի, որ ի տարբերություն Գվարդիոլայի թիմի, այսօր Մոուրինյոյի "ճամբարում" հոգեբանական լուրջ հաղթանակ են տոնում: Եվ վաղվա խաղին այդ հաղթանակը կարող է թե օգնել, թե խանգարել Մադրիդի "Ռեալին": Այնուամենայնիվ, փորձենք գուշակել այս հանդիպման արդյունքը. onlyfootball.ucoz.com կայքի կարծիքով այս խաղը կավարտվի մադրիդցիների հաղթանակով 3-1 հաշվով, թեև նույն հաշվով կարող է և հաղթել "Բարսելոնան": Ամեն դեպքում, եթե նայենք հոգեբանական տեսանկյունից, ապա կարելի է ասել, որ Գվարդիոլան իրավացի է` "Ռեալն" այս խաղում ֆավորիտ է: