Մարտի 26-ին` Հանրապետական մարզադաշտում տեղի կունենա հանդիպում, որի նշանակությունը հայկական ֆուտբոլի համար անասելի մեծ է: Հայաստանի հավաքականը երկարատև հիասթափություններից հետո վերջապես դարձել է համայն հայության ամենասիրելի թիմը: Մեր տղաներն իրենց փայլուն խաղով ստիպեցին հայկական ֆուտբոլի ամենամեծ քննադատներին փոխել իրենց կարծիքը մեր ընտրանու նկատմամբ: Այսօր մենք ունենք այնպիսի հավաքական, որը ի զորու է հաղթել ցանկացած մրցակցի` թիմային փայլուն խաղ ցուցադրելու շնորհիվ: Մեր վետերանների` Ռոման Բերեզովսկու և Սարգիս Հովսեփյանի շուրջ կառուցվել է մի թիմ, որը ամենաերիտասարդներից է եվրոպական հավաքականների շարքում: Մեր տղաները իրենց հիասքանչ խաղով գրավեցին շատ մարդկանց ուշադրությունը, և համոզված ենք, որ եվրոպական ակումբները հետևում են մեր տղաների առաջընթացին, և շուտով մեր կազմը լի կլինի եվրոպական տարբեր առաջնություններում հանդես եկող խաղացող լեգիոներներով:

Մարտի 26-ին համայն հայ ժողովուրդը սպասում է հոկտեմբեր ամսից, երբ մեր տղաները վստահորեն հաղթեցին Սլովակիայի և Անդորայի ընտրանիներին: Այդ ժամանակ հայ ժողովուրդը ցնծում էր ուրախությունից: Հայ ժողովուրդը ցանկանում է հաղթել Ռուսաստանի պես շատ ուժեղ ընտրանուն նաև վաղը, և մեր փոքրիկ Հանրապետական մարզադաշտը, որը կրում է սպարապետ Վազգեն Սարգսյանի անունը, կաջակցի մեր տղաներին ողջ հանդիպման ընթացքում: Նման ոգևորություն հայկական ֆուտբոլի նկատմամբ երբևիցէ չեմ հիշում, և դա հասկանալի է, քանի որ պատկանում են նորանկախ Հայաստանի Հանրապետության սերնդին, և բացի հիասթափությունից, ուրիշ ոչնչի ականատես չէինք եղել մինչև ԵՎՐՈ 2012-ի նախընտրական փուլի հանդիպումները:                                                           

Բոլորս էլ գիտակցում ենք, որ Անդրեյ Արշավինը և Յուրի Ժիրկովը շատ ուժեղ ֆուտբոլիստներ են, իսկ Ռուսաստանի հավաքականն, ամբողջությամբ վերցրած, շատ ուժեղ է: Ռուսական ֆուտբոլում այսօր միլլիոնավոր դոլլարներ են շրջանառվում, ինչի արդյունքում ռուսական շատ ակումբներ լուրջ հաջողությունների են հասնում Եվրագավաթներում: Իսկ ԵՎՐՈ 2008-ի ժամանակ ռուսները նվաճեցին բրոնզե մեդալները: Դա հետխորհրդային Ռուսաստանի հավաքականի ամենամեծ նվաճումն է, և այդ հավաքականից շատ խաղացողներ այսօր խաղում են:

Այս բոլոր հանգամանքները պետք է հաշվի առնեն մեր խաղացողները, բայց խաղադաշտում մեր տղաները ապացուցել են, որ հեղինակություններ չեն ճանաչում: Երևի բոլորդ էլ կհիշեք, թե ինչպես մեր Հենոն փակեց Իտալիայի "Ա սերիայի" այս մրցաշրջանի լավագույն խաղացողներից մեկին` Մարեկ Համշիկին, ում նկատմամբ իսկական որս են սկսել եվրոպական գրանդները:  Այդ խաղում "Նապոլիի" ֆուտբոլիստին տեսնում էինք միայն դրվագներում, և նման կերպ խաղալու դեպքում մերոնք ռուսներին կարող են հաղթել: Հայաստանի ընտրանին` Վարդան Մինասյանի գլխավորությամբ, միշտ աչքի է ընկել կոլեկտիվ խաղով և ի վիճակի է վաղը հաղթելու Ռուսաստանի ընտրանուն:

Արդեն այսօր կարող ենք ասել, որ պատրաստ ենք. պատրաստ ենք հոգեպես, հավատում ենք մեր տղաներին, ինչը, ամենակարևորն է: Երազից մի քայլ առաջ. այսպես կարող ենք բնութագրել հայ ժողովրդի հոգեվիճակը այս պահին, ԵՎՐՈ 2012-ը իսկապես բաղձալի երազանք է հայ ֆուտբոլասերների և համայն հայության համար: Դե ուրեմն մենք չենք խնայում մեզ Հանրապետական մարզադաշտում, աջակցում ենք ամեն հնարավոր ձևով: Երազանքը այնքան մոտ է, և այդ երազը պետք է իրականություն դառնա. Մենք հավատում ենք ձեզ Տղերք ջան, և մենք հաղթելու ենք: