 Անգլիայի գործող չեմպիոն "Մանչեսթր Սիթիի" դարպասապահ Ջո Հարտը, ում կոպիտ սխալի պատճառով "քաղաքայինները" վերջին խաղում պարտվեցին "Սանդերլենդին", այսօր նշել է, որ ինքը աշխատում է ուշադրություն չդարձնել քննադատություններին: "Այո՛, ես բազմաթիվ քննադատություններ ստացա իմ հասցեին: Բայց չէ՞ որ մարդկանց անհրաժեշտ է ինչ-որ բան խոսել, նրանք իրենց մեկնաբանությունների համար փող են ստանում: Իսկ ես պետք է ուժեղ և ինքնավստահ մնամ, որպեսզի ամեն շաբաթ ողջ ուժերս տամ խաղին: Ես լավ մարզավիճակում եմ, բայց երբեմն չի ստացվում փրկել թիմին: Դա բավականին նորմալ է, ջանքերի կամ կենտրոնացվածության պակասն այստեղ կապ չունի: Բնականաբար բոլորն էլ ուզում են կատարյալ լինել և սխալներ չգործել, բայց այդպես չի լինում",- մեջբերել է Անգլիայի ազգային հավաքականի հիմնական դարպասապահի խոսքը "Sky Sports"-ը: |