13:18 Մեր ընտրանին նոր մարզազգեստ ունի | |
 Հետայսու մեր ֆուտբոլի ազգային հավաքականի մարզազգեստները կպատրաստի աշխարհահռչակ «Adidas» ընկերությունը: Երեկ հայկական ֆուտբոլի զարգացման համար եւս մի նորագույն էջ բացվեց. կայացավ Հայաստանի ազգային հավաքականի՝ «Adidas» աշխարհահռչակ մարզական ընկերության կողմից պատրաստված նոր համազգեստի շնորհանդեսը: Շնորհանդեսի ժամանակ լրագրողների հետ կայացած հանդիպմանը մասնակցում էին ՀՖՖ գործադիր տնօրեն Արմեն Մինասյանը, ազգային ընտրանու գլխավոր մարզիչ Վարդան Մինասյանը եւ հավաքականի ավագ Սարգիս Հովսեփյանը, ովքեր պատասխանեցին նաեւ լրագրողներին հուզող մի շարք հարցերի:«Վերջապես մեր ընտրանու երկրպագուների ու հասարակության կողմից սպասված մարզահագուստը ժամանել է Հայաստան: Կարծում եմ, որ այն շատ գեղեցիկ ու որակյալ կլինի, բացի դրանից` նոր հաջողություններ կբերի մեր հզոր թիմին»,- միջոցառման սկզբում ասաց ՀՖՖ գործադիր տնօրեն Արմեն Մինասյանը՝ հավելելով, որ շատ շուտով Հայաստանի ազգային հավաքականի համազգեստը գնելու հնարավորություն կունենան նաեւ երկրպագուները: «Թե՛ մեր ընտրանու մարզաշապիկը, թե՛ հավաքականի այլ ատրիբուտները շատ շուտով կլինեն ֆան-խանութներում, որի մասին հաստատ լրացուցիչ տեղեկություններ կհայտնենք մոտ ապագայում»,- նշեց ՀՖՖ գործադիր տնօրենը: Արմեն Մինասյանը նշեց նաեւ, որ «Adidas»-ի հետ ընդամենը մեկ մրցափուլի (ֆուտբոլի աշխարհի 2014 թ-ի ընտրական փուլ) պայմանագիր է կնքվել, որը կարող է հետագայում երկարաձգվել: Ազգային ընտրանու ավագ Սարգիս Հովսեփյանն էլ դրական կարծիք ուներ նոր մարզահագուստի վերաբերյալ. «Հանրահայտ «Adidas»-ն իր մակարդակով ու որակով ավելի բարձր է, քան «Hummel»-ը: Հույս ունեմ, որ այն մեր թիմին կօգնի` էլ ավելի լավ արդյունքների հասնելու»: Թիմի գլխավոր մարզիչ Վարդան Մինասյանն էլ անկեղծորեն խոստովանեց, որ միայն այսօր է տեսնում նոր մարզաշապիկները, ինչն իրեն հաճելիորեն ուրախացրել է: «Շատ հաճելի էր այս մարզազգեստը: Գիտեմ, որ «Adidas»-ը մարզահագուստ արտադրող բոլոր ընկերություններից վարկանիշով ամենաբարձրն է, ինչպես նաեւ միշտ աչքի համար հաճելի արտադրանքներ է թողարկում»,- ասաց Վարդան Մինասյանը: Ըստ ՀՖՖ գործադիր տնօրեն Արմեն Մինասյանի՝ հավաքականի մարզաշապիկը պատրաստելուց հաշվի են առնվել մեր դրոշի գույները: «Հանգամանալից քննարկումներ են տեղի ունեցել արտադրողի հետ, ու վերջնական տարբերակը դուք տեսնում եք այսօր: Գուցե այն նման լինի այլ հավաքականների մարզաշապիկներին, սակայն դրա պատճառը միայն մեկն է. արտադրողը հենց նույն ընկերությունն է: Նմանություններ գտնել միշտ էլ հնարավոր է»,- ասաց ՀՖՖ գործադիր տնօրենը՝ ասուլիսի ներկաներին տեղեկացնելով, որ մարզազգեստի նոր տեսքի վերաբերյալ բազմաթիվ զրույցներ են եղել նաեւ հավաքականի խաղացողների հետ: Հ.Գ.: Ազգային ընտրանու մոլի երկրպագու Միքայելի կարծիքով՝ ավելի լավ կլիներ, որ հին մարզազգեստն օգտագործեին, քանի որ նորը ոչ մի ինքնատիպ լուծումներ չունի: Բացի դրանից` նոր մարզազգեստը շատ նման է Իսպանիայի ազգային ընտրանու տնային նախկին մարզաշապիկին: «Ամեն դեպքում կարեւորն այն է, որ մեր թիմը մշտապես հաղթի` անկախ այն հանգամանքից, թե ինչպիսի մարզաշապիկով է խաղում: Մշտական հաղթանակների պարագայում ես անգամ համաձայն եմ, որ թիմը մերկ դուրս գա խաղադաշտ»,- անկեղծորեն խոստովանեց ազգային հավաքականի երկրպագուն: | |
|
| |
| Total comments: 0 | |