Մադրիդի "Ռեալի" գլխավոր մարզիչ, սկանդալային ու յուրահատուկ Ժոզե Մոուրինյոն երեկ Marca հանդեսի թղթակցի հետ զրույցում հայտարարել է, որ վերջին երկու հանդիպումներում անհաջող ելույթներից հետո իր թիմում հոգեբանական մթնոլորտը չի փչացել: "Հիմա նույնիսկ ավելի հեշտ է տրամադրել ֆուտբոլիստներին, քան առաջ: Նման դեպքերում մոտիվացիան մեծանում է, հատկապես երբ մարդը պատասխանատու է: Մենք բոլորս լավատեսորեն ենք տրամադրված: Մեզ չեն գոհացնում բացասական արդյունքները և, բնականաբար, մենք ցանկանում ենք շուտափույթ կերպով դուրս գալ այս իրավիճակից: Վերջին շաբաթը մենք իսկապես վատ խաղացինք: Ես չեմ ցանկանում ոչինչ թաքցնել և չեմ վախենում այդ մասին ուղիղ խոսելուց: Սա մեզ համար ճգնաժամ չէ: Ճգնաժամը դա երեք շաբաթ վատ խաղալն է... Ինձ մոտ այնպիսի տպավորություն է, որ ստեղծված իրավիճակը շատերին է ուրախացնում: Բայց այսօր մենք վերջ կտանք նրանց ուրախությանը",-Մոուրինյոյի խոսքերն է մեջբերում օրաթերթը: