22:36 Մխիթարյան. "Իմ շահերը ներկայացնում եմ ինքս" | |
 Հայաստանի ազգային հավաքականի և Դոնեցկի "Շախտյորի" առաջատար Հենրիխ Մխիթարյանը այսօր ծավալուն հարցազրույց է տվել "Украинский футбол" պարբերականին, որը Ձեզ ենք ներկայացնում առանց խմբագրման: - Ձեր թիմակից Տոմաշ Հյուբշմանը կարծում է, որ "Շախտյորը" կարող է հաղթել նաև Անգլիայում: Իսկապե՞ս այդպիսի վստահություն կա, որ երկու անգամ անընդմեջ կարող եք հաղթել "Չելսիի" պես թոփ-ակումբին: - Հարցն այն չէ, ինչ կարող ենք, և ինչ չենք կարող: Պարզապես մենք գիտենք մեր ուժը ու հավատում ենք դրանց: Միևնույն ժամանակ հասկանում ենք, որ հնարավորություն իրոք ունենք: - Ի՞նչ դժվարությունների հետ կարող է բախվել "Շախտյորը" "Սթեմֆորդ Բրիջ" մարզադաշտում: - Ասեմ, որ Դոնեցկում էլ ավելի հեշտ չէր, քան կարող է լինել Լոնդոնում: Մեր Միստերը մեզ գործողությունների հստակ ծրագիր է տվել, այնպես որ եթե այն իրագործենք, ամեն ինչ լավ կլինի: - Կարո՞ղ է թիմը փոխվել երկու-երեք շաբաթվա ընթացքում: - Խաղաոճն, իհարկե, չի փոխվի: - Հետևե՞լ եք "Չելսիի" խաղերին այս ընթացքում: - Նայել եմ միայն "Չելսիի" խաղը "Մանչեսթեր Յունայթեդի" դեմ, որտեղ նրանք պարտվեցին 2-3 հաշվով: Մյուս խաղերը չեմ էլ հասցրել դիտել, քանի որ մենք էլ հանդիպումներ ունեինք: Այդ խաղում "Չելսին" պարտվում էր 0-2 հաշվով, հետո հավասարեցրեց խաղի հաշիվը, ցանկանում էր հաղթել, սակայն երրորդ գոլը բաց թողեց: Ֆուտբոլիստներն առաջ նետվեցին, մոռացան պաշտպանության մասին, այդ պատճառով էլ պարտվեցին: - Որակազրկման պատճառով վերջերս բաց թողեցիք Զապորոժիեի "Մետալուրգի" դեմ կարևոր հանդիպումը, լոնդոնյան ճանապարհորդությունից առաջ դա օգնե՞լ է ուժեր խնայել: - Խաղի ժամանակ կերևա: Խոստովանեմ` շատ էի ցանկանում խաղադաշտ դուրս գալ շաբաթ օրը, սակայն, ստացվել էր այնպես, որ որակազրկված էի: - "Շախտյորի" ու "Դինամոյի" նախկին ֆուտբոլիստ Օլեգ Մատվեևը կարծիք է հայտնել, որ անպայման կգերազանցեք Ուկրաինայի առաջնությունների ռմբարկուների ռեկորդը (22 գոլ): Դուք նույնպես այդպե՞ս եք կարծում: - Ինձ համար ռեկորդը կարևոր չէ: Կարևոր է, որ "Շախտյորը" հաղթի առաջնությունում, գավաթի խաղարկությունում, հաջող հանդես գա "Չեմպիոնների լիգայում": Իսկ եթե ռեկորդ սահմանեմ, ուրախ կլինեմ: Եթե չստացվի, չեմ հիասթափվի, որովհետև գիտեմ, որ դեռ շատ պետք է աշխատեմ: Երբեք չի կարելի բավարարվել ձեռք բերածով, միշտ պետք է առաջ գնալ: - Շատ մասնագետներ Ձեզ նոր Մեսսի են անվանում, ի՞նչ կասեք այդ կապակցությամբ: - Շատ հաճելի է նման գնահատականը, սակայն կարծում եմ` մենք շատ տարբեր խաղաոճեր ունենք: Մեսսին աշխարհի ուժեղագույն ֆուտբոլիստն է: - Վերջերս էլ Վլադիմիր Պյատենկոն, որի գլխավորությամբ Դուք խաղացել եք Դոնեցկի "Մետալուրգում", ասել էր որ մոտ ապագայում Դուք կարող եք խաղալ մեծ ակումբում: Ֆուտբոլային գործակալներն արդեն գրոհո՞ւմ են Ձեզ: - Ես ուշադրություն չեմ դարձնում դրան: Պետք է լավ աշխատել, այդ ժամանակ հաջողություններ էլ կլինեն: Ես Դոնեցկի "Մետալուրգ" եմ տեղափոխվել առանց գործակալի, "Շախտյոր" եմ եկել կրկին առանց գործակալի, այդ պատճառով պետք է մարզվել ու խաղալ, իսկ գործակալների մասին չարժե մտածել: - Ամեն դեպքում, Դուք գործակալ ունե՞ք: - Այսօրվա դրությամբ ես ֆուտբոլային գործակալ չունեմ: - Իսկ ո՞վ է ներկայացնում Ձեր շահերը: - Ես` ինքս: - Հավատու՞մ եք Վիլիանի ուժերին, ով ասել է, որ կփորձի գոլ խփել "Չելսիին" Լոնդոնում: - Տա Աստված, որ նրան հաջողվի դա անել: Իսկ եթե հաղթենք, կրկնակի կուրախանանք: - Կօգնե՞ք նրան: - Իհարկե, եթե այնպիսի իրավիճակ լինի, երբ պետք է փոխանցում կատարեմ: Եվ ոչ միայն Վիլիանին, այլ նաև մյուս թիմակիցներիս: Ես երբեք ժլատություն չեմ անում, խաղում եմ թիմի համար, իսկ թիմի հաջողությունը բոլորիս հաջողությունն է: - Հենրի՛խ, առաջ գոլային շատ պահեր չէիր իրացնում, այժմ իրավիճակը միանգամայն այլ է: - Ամեն ինչ այնքան հարթ չէ, ինչպես ասացիք: Լինում է, որ հարմար դիրքից էլ վրիպում եմ: Սակայն ես դժբախտություն չեմ սարքում դրանից: Շարունակում եմ աշխատել: Եվ ես չեմ թուլացնում աճմանս տեմպերը, եթե այսօր 14 գոլ խփել եմ, մնացածը իրենք իրենց չեն հայտնվելու դարպասում (ծիծաղում է): - "Շախտյոր"-"Չելսի" խաղից առաջ դեռևս Դոնեցկում էլ Միստերին հարցրել են. արդյո՞ք թիմը հասունացել է լոնդոնյան ակումբի պես թոփ թիմերի հաղթելու համար, ինչին նա դրական պատասխան է տվել: - Չեմ սիրում խոսել այդ թեմայով: Եթե կկարողանանք, կհաղթենք նաև Լոնդոնում, հակառակ դեպքում` ոչ: Չեմ պնդի, որ պարտադիր հաղթանակ ենք տանելու, ամեն ինչ հնարավոր է: - Դուք կարծո՞ւմ եք, որ լոնդոնյան հանդիպումը վճռորոշ կլինի E խմբի առաջատարին որոշելու համար: - Ոչ, քանի որ դեռ երկու հանդիպում էլ առջում է` Դանիայում և Իտալիայում:
| |
|
| |
| Total comments: 0 | |