Իսպանական "Վիլյառեալի" իտալացի հարձակվող Ջուզեպպե Ռոսսին այս ամռանը չի լքի իր ներկայիս ակումբը. այս մասին մամուլի ներկայացուցիչներին տեղեկացրել է ֆուտբոլիստի գործակալ Ֆեդերիկո Պաստորելոն: "Ես հենց նոր Իսպանիայից եմ ժամանել: Բոլորը կարող են հանգիստ լինել. Սանտի Կասորլային վաճառելուց հետո "Վիլյառեալը" մտադիր չէ հրաժեշտ տալ նաև Ռոսսիին: Միայն այդ տեղափոխությամբ ակումբը լուծեց իր ֆինանսական խնդիրները: Ասեմ նաև, որ Ռոսսին ցանկանում էր խաղալ "Յուվենթուսում", բայց մենք հասկանում ենք նաև "Վիլյառեալի" նախագահի դիրքորոշումն այս հարցում",-Ռոսսիի գործակալի խոսքերն է մեջբերում La Gazzetta dello Sport պարբերականը:
Հիշեցնենք, որ ավելի վաղ հաղորդվել էր, որ Ռոսսին կարող է այս ամռանը տեղափոխվել "Յուվենթուս":