 Մադրիդի "Ռեալի" հարձակվող Քրիշտիանու Ռոնալդուն հայտարարել է, որ չի կարող համեմատել իրեն "Բարսելոնայի" արգենտինացի գերաստղ Լիոնել Մեսսիի հետ, քանի որ իրենք խաղադաշտում միանգամայն տարբեր գործողություններ են կատարում, սակայն կարծիք է հայտնել, որ այս պահին նա ավելի լավ խաղացող է: Ռոնադլուն հեղինակավոր CNN World Sport հաղորդման եթերում ասել է. "Երբեմն սա ինձ արդեն ձանձրացնում է: Կարծում եմ,որ նրան նույնպես դա ձանձրացնում է, քանի որ մեզ անընդհատ համեմատության մեջ են դնում: Դուք չեք կարող համեմատել Ferrari և Porsche մակնիշի մեքենաները, քանի որ դրանք տարբեր շարժիչներ են: Նա "Բարսելոնայի" համար է անում լավագույնը, իսկ ես` "Ռեալի": Անհավանական է… Մենք ինքներս գերազանցում ենք մեր իսկ սահմանած ռեկորդները: Երբեմն մտածում եմ, որ երկուսիս միջև մրցակությունը մեզ առաջ է մղում ավելի կատարելագործվելու, այդ պատճառով էլ մրցակցությունն այդքան սուր է ստացվում: Ահա թե ինչու են "Ռեալն" ու "Բարսելոնան" լավագույն թիմերն աշխարհում, քանի որ յուրաքանչյուրը խթան է հանդիսանում մյուսի համար: Հարցն այն չէ, թե ով է լավագույնը: Ես պարզապես չեմ սիրում համեմատվել ուրիշների հետ: Որոշներն ասում են` ես եմ լավը, ոմանք` նրան են լավագույնը համարում: Սակայն ճիշտ կլինի օրվա վերջում որոշել, թե ով էր լավագույնն այդ պահին: Կարծում եմ` այս պահին դա ես եմ": |