07:22 Շեյխ Մանսուր. նա եկավ, որպեսզի ֆուտբոլում մտցնի նոր կանոններ | |
 2008 թվականին արաբ Շեյխ Մանսուրը ձեռք բերեց անգլիական "Մանչեսթեր
Սիթի" ակումբի բաժնետոմսերի 90 տոկոսը, իսկ ևս մեկ տարի անց գնեց ևս 10
տոկոսը: Ֆուտբոլային աշխարհում այդ օրվանից սկսեց գլուխ բարձրանալ
միլիոնավոր դոլլարների վրա կառուցվող "Մանչեսթեր Սիթին":
Շեյխ Մանսուր բին Զայեդ ալ-Նախյանը փորձեց կրկնել Ռոման Աբրամովիչի
ճանապարհը, ով ֆուտբոլային ակումբ "Չելսին" շատ կարճ ժամանակահատվածում
վերածեց Եվրոպայի ամենաուժեղ ակումբերից մեկի: Շեյխ Մանսուրը ծնվել է
1971թ.-ի օգոստոսի 5-ին` Աբու-Դաբիում` Արաբական Միացյալ
Էմիրություններում: Շեյխ Մանսուրը Էմիրատներում իշխող արքայական տոհմի
անդամներից է: Deloitte Sports Business Group ընկերության վերլուծաբանները
հաշվել են, որ Շեյխ Մանսուրի ծախսած գումարների արդյունքում "Մանչեսթեր
Սիթին" գլխավորում է ֆուտբոլային ակումբների ցուցակը` ըստ գումարների
վատնման (2010թ.-ի ամառ): 2010թ.-ի ամռանը "Մանչեսթեր Սիթիի" ծախսած 125
միլիոն եվրոն ռեկորդային ցուցանիշ էր անգլիական "Պրեմիեր լիգայի" համար, և երկրորդ տարին
անընդմեջ "Սիթին" ամենաշատ գումարն էր ծախսել խաղացողներ ձեռք բերելու
համար Անգլիայում` գրում է Bloomberg հանդեսը: 2008թ.-ից մինչև 2010թ.-ի ամառ "Մանչեսթեր Սիթին" նոր խաղացողների ձեռքբերման համար վատնել է ավելի քան 350 միլիոն եվրո:
Կարծես թե ՈւԵՖԱ-ն ցանկանում է լուրջ վերահսկողություն մտցնել ֆուտբոլային
ակումբների տրանսֆերային գործունեության մեջ, և թիմերին թույլ տալ գնել
ֆուտբոլիստների` ըստ սեփական բյուջեի չափի: Սա ՈւԵՖԱ-ի համար լինելու է
ծանրագույն մի գործընթաց, և ֆուտբոլի հետագա զարգացումը մեծապես կախված է այս հարցում
ՈւԵՖԱ-ի վարած քաղաքականությունից: Արդեն իսկ այս ամռանը
"Մանչեսթեր Սիթին" հասցրել է երկու տրանսֆեր իրականացնել, որոնք բավականին
համեստ բնույթ ունեն: Սակայն արաբական մուլտիմիլիարդատերերից միշտ ավելին
է պետք սպասել: Լուրեր են պտտվում Սերխիո Ագուերոյին ձեռք բերելու մասին,
ինչը "Սիթիի" վրա կնստի ոչ պակաս, քան 40 միլիոն եվրո: Սակայն ոչ բոլոր
դեպքերում են "Մանչեսթեր Սիթիի" կատարած տրանսֆերները համապատասխանում
մարդկային բանականությանը. ասենք ինչո՞ւ անցած ամռանը Ռոբերտո Մանչինին գնեց
եզրային երկու պաշտպանների` Ալեքսանդր Կոլարովին և Ժերոմ Բոատենգին, այն
դեպքում, որ թիմում էր նաև Ուեյն Բրիդջը: Այս պաշտպաններից երկուսը նոմինալ
ձախ պաշտպաններ են, իսկ Բոատենգը կարող է խաղալ նաև աջ եզրում, սակայն
կարծես թե նրան գնել էին ձախ եզրում խաղալու համար, քանի որ աջ պաշտպան
Միկա Ռիչարդսի հնարավորությունների վրա դեռևս ոչ ոք չի համարձակվում
կասկածել: Առավել քան զարմանալի է այն, որ ամառային տրանսֆերային պատուհանի
ժամանակ "Քաղաքայինների" գնած առաջին ֆուտբոլիստը հենց ձախ եզրային
պաշտպան է` Գայել Կլիշին: Եվ այս ամենը, մեղմ ասած, զարմանալի է:
Հատկանշական է "Մանչեսթեր Սիթիի" ղեկավարներից մեկի` Բրայան Մարվուդի
հայտարարությունը. "Հաճելի է, որ մենք ունենք այնպիսի սեփականատերեր, ովքեր
պատրաստ են իրենց հսկայական միջոցները ծախսել թիմի հզորացման համար":
Որքա՞ն է շարունակվելու այս ամենը, հայտնի չէ և ոչ մեկին: Սակայն մեկ բան
կամ ավելի ստույգ մեկ ցանկություն պարզ է բոլոր ողջամիտ ֆուտբոլասերների
մոտ` այսպես շարունակվել այլևս չի կարող, և միլիարդավոր դոլլարների
վատնումը ֆուտբոլում պետք է կասեցվի ՈւԵՖԱ-ի կողմից: Մնում է նաև մեկ
անհայտ հարց` կկարողանա՞ արդյոք ՈւԵՖԱ-ն կասեցնել այս ամենը և ֆուտբոլը
մաքրել մեգամիլիարդներից, ինչին շատերս արդեն իսկ չենք հավատում: Նարեկ Ղարդյան Աղբյուրներ` sportbox.rubfm.ru ru.wikipedia.org | |
|
| |
| Total comments: 8 | |
|
| |