08:41 Շշուկներ կան Եվրոպայում. Մաս 5 | |
 Հերթական անգամ մեր կայքի ընթերցողներին կներկայացնենք վերջին ժամերին ողջ աշխարհում տարածված տրանսֆերային գրեթե բոլոր շշուկները, կանդրադառնանք բոլոր հնարավոր տրանսֆերներին ու նաև կմեկնաբանենք, թե որքանով այդ շշուկները կարող են մոտակա օրերին իրականություն դառնալ: Դե ուրեմն մենք արդեն սկսում ենք. հետևե՛ք մեր օրինակին: Եղե՛ք ակտիվ, մասնակցե՛ք ծավալվող քննարկումներին կամ էլ ինքներդ թեմաներ առաջարկեք:*** Հոլանդական "Հերենվենի" մարրոկացի առաջատար հարձակվող Ուսսամա Ասսաիդին, ամենայն հավանականությամբ, իր հետագա ֆուտբոլային կարիերան կշարունակի թուրքական "Գալաթասարայում": Կողմերը վաղուց արդեն պայմանավորվել են: Կարծիք. Ընդամենը 1 տարուց տղան կարող էր անվճար բաժին ընկնել ինչ-որ թիմի, իսկ այսպես նրա համար գումար կվճարվի: *** Ռուսաստանի ֆուտբոլային միությունը լրջորեն մտադիր է իր երկրի ազգային հավաքականի մարզչի պաշտոնն առաջարկել իտալացի հայտնի մասնագետ Ֆաբիո Կապելլոյին, ով ներկայումս աշխատանք չունի: Սպասվում է, որ մոտ ժամանակներս արդեն կսկսվեն մարզչին Ռուսաստան հրավիրելու կազմակերպված աշխատանքները, իսկ մինչ այդ ազգային թիմը կմարզի Ալեքսանդր Բորոդյուկը, ով "Դինամոյի" փոխնախագահն է: Նրա գլխավորությամբ ընտրանին օգոստոսի 15-ին ընկերական խաղի կմասնակցի: Կարծիք. Իհարկե, դեռ անհնար է թվում, որ ռուսները կկարողանան գրավել Ֆաբիո Կապելլոյին, սակայն ով գիտե, գուցե իտալացի հայտնի մասնագետը հետևի իր հայրենակից Լուչիանո Սպալետտիի օրինակին և սկսի մարզել Ռուսաստանի ազգային ընտրանին: *** Արգենտինական "Ռիվեր Փլեյթի" գլխավոր մարզիչ Մաթիաս Ալմեյդան, ով օրերս է նոր համաձայնագիր կնքել թիմի հետ, ասել է, թե թիմում ինչ փոփոխություններ են սպասվում` նշելով, որ իր հարձակվողներ Ֆեռնանդո Կավենագին և Ալեխանդրո Դոմինգեսը ստիպված են հեռանալ թիմից: "Շնորհակալ ենք նրանց իրենց կատարած աշխատանքի համար, բայց մեր թիմը պետք է լինի ավելի արագ և ագրեսիվ, իսկ այդ տղաները չեն համապատասխանում մեր նոր խաղաոճին",- ասել է "Ռիվեր Փլեյթի" գլխավոր մարզիչը: Կարծիք. Ֆեռնանդո Կավենագին, ամենայն հավանականությամբ, երևի թե Եվրոպա էլ չի վերադառնա, քանի որ նա այլևս անելիք չունի, իսկ ահա Ալեխանդրո Դոմիգեսը, ով պատկանում է իսպանական "Վալենսիային", կփորձի ցույց տալ, որ ունակ խաղացող է: *** Բրազիլական "Վասկո դա Գամա" ակումբի և Բրազիլիայի ազգային ընտրանու խաղացող Ռոմուլո Բորխես Մոնտեյրոն կարող է իր ֆուտբոլային կարիերան շարունակել Մոսկվայի "Սպարտակում": Խաղացողի համար առաջարկվում է 8 մլն եվրո, որը թերևս քիչ է նման խաղացողի համար, սակայն "Վասկո դա Գամայի" ղեկավարությունը պատրաստ է այդքանով էլ վաճառելու նրան: Կարծիք. Խաղացողի ծառայություններով ժամանակին հետաքրքրվում էին եվրոպական գրանդները` "Յուվենթուսը", "Նապոլին" ու "Ինտերը", որոնք ամեն ինչ անում էին նրան ձեռք բերելու համար, բայց "Սպարտակը" բոլորից շատ ու շուտ շահեց այս հարցում: *** Անգլիական "Լիվերպուլի" և իտալական "Ինտերի" նախկին գլխավոր մարզիչ Ռաֆայել Բենիտեսը, ով այսօր աշխատում է ոչ իր մասնագիտությամբ (Խմբ. նա ֆուտբոլային մեկնաբան է EuroSport հեռուստաընկերությունում), մերժել է իտալական "Ա Սերիա" վերադարձած "Սամպդորիայի" ղեկավարության` իրենց թիմը գլխավորելու առաջարկը: Ըստ որոշ տեղեկությունների` Բենիտեսը չի ցանկացել աշխատել մի թիմում, որը դեռ ամբողջովին կազմավորված չէ: Այժմ իտալական թիմը մտածում է Դիդյե Դեշամի մասին: Կարծիք. Իհարկե, հենց սկզբից էլ կարելի էր սպասել, որ Ռաֆա Բենիտեսը կմերժի, քանի որ "Սամպդորիան" դեռևս իր կազմում չունի համապատասխան ֆուտբոլիստներ, որոնց միջոցով կարելի է հավասարը հավասարի խաղալ ուժեղ թիմերի հետ: *** Կիևի "Դինամոյի" հարձակվողական ոճի կիսապաշտպան Ալեքսանդր Ալիևը օրերս հանվել է տրանսֆերի, քանի որ այսօր թիմի ղեկավարությունը ցանկանում է արագորեն ձեռբազատվել այդ խաղացողից: Անցած մրցաշրջանի վերջում Ալեքսանդր Ալիևն այլևս հիմնական կազմի խաղացող չէր և իմաստ չկա թիմում պահել բարդ բնավորության տեր այդ ֆուտբոլիստին: "Մենք հաստատ չենք ցանկանում այդպիսի բարձրակարգ ու փորձառու խաղացողին նստեցնել պահեստայինների շարքում, և լավ հնարավորություն ենք տալիս նրան, որպեսզի կարողանա շարունակել կարիերան",- ասել է թիմի գլխավոր մարզիչ, ռուս մասնագետ Յուրի Սյոմինը: Կարծիք. Վերջերս գնելով Նիկո Կրանչարին` կարելի էր սպասել, որ Ալեքսանդր Ալիևը կհանվի տրանսֆերի. ո՞ւմ է պետք այլևս: *** Մադրիդի "Ռեալի" ֆրանսիացի հենակետային կիսապաշտպան Լասսանա Դիարան կարող է շատ մոտ օրերս տեղափոխվել իտալական "Միլան", որը լրջորեն ցանկանում է համալրում ունենալ կիսապաշտպանական գծում: Խաղացողն այժմ գտնվում է հեռավոր Ամերիկայում, որտեղ իր հանգիստն է վայելում, իսկ Եվրոպա վերդառանալուն պես նա կարող է դառնալ "Ռոսսոների": Կարծիք. Ժոզե Մոուրինոյն դժվար թե իր ձեռքից բաց թողնի ունիվերսալ այս խաղացողին, եթե իհարկե "Արքայական ակումբը" իր խաղացողին ցանկացող թիմից չստանա համապատասխան տրանսֆերային փոխհատուցում, որը շուրջ 20 մլն եվրո է կազմում: *** Անգլիական "Բլեքբեռնի" 29-ամյա արագավազ հարձակվող Յակուբու Այեգբենին իր հետագա կարիերան կշարունակի չինական "Հունաչժոու Ֆուլի" ակումբում, որի հետ արդեն 3 տարվա պայմանագիր է ստորագրել` բավական շահավետ աշխատավարձով: Կարծիք. Ինչո՞ւ պետք է անգլիական "Պրեմիեր լիգայից" խաղացողը մեկնի հեռավոր Չինաստան: Միմիայն փողի, փողի համար: *** Լոնդոնի "Չելսիին" պատկանող բելգիացի 20-ամյա դարպասապահ Տիբո Կուրտուան այս տարի էլ կրկին վարձավճարային հիմունքներով կխաղա Մադրիդի "Ատլետիկոյում": Ինչպես հայտնում են իսպանական ԶԼՄ-ները, այս տարի էլ դարպասապահը կլինի թիմի առաջատարներից մեկը. նրան արդեն իսկ խոստացել են մշտական ելույթներ թիմի հիմնական կազմում: Կարծիք. Ամենայն հավանականությամբ, 2013/14 մրցաշրջանում էլ Տիբո Կուրտուան "Չելսիի" խաղացող դեռ չի լինի, քանի որ չեխ դարպասապահ Պետեր Չեխն ուղղակի հիանալի է կատարում իր աշխատանքը` տապալելով իր բոլոր մրցակիցներին: *** Կատալոնական "Բարսելոնայի" ղեկավարությունը երեկ հայտարարել է Խորդի Ալբայի տրանսֆերի կայացման մասին` նշելով, որ իսպանացի եզրային պաշտպանի համար վճարել են շուրջ 14 մլն եվրո տրանսֆերային փոխհատուցում: Այժմ Իսպանիայի ընտրանու կազմում Ուկրաինայում գտնվող խաղացողը հուլիսի 5-ին բժշկական զննում կանցնի ու 5 տարվա պայմանագիր կկնքի: Կարծիք. Ամեն դեպքում "Բարսելոնան" չկարողացավ այս անգամ կոտրել "Վալենսիայի" դիմադրությունը և վճարեց պանանջվող ամբողջ գումարը, ավելին` այդ գումարը պետք է վճարվի միանգամից, ոչ թե մոտակա տարիների կամ էլ ամիսների ընթացքում:
| |
|
| |
| Total comments: 0 | |