 Լրագրողների հետ կայացած մամուլի ասուլիսի ժամանակ Միլանի "Ինտերի" հոլանդացի կիսապաշտպան Ուեսլի Սնեյդերը հայտարարել է, որ իրականում ինքը չի ցանկանում հեռանալ իտալական ակումբից, քանի որ իրեն շատ հանգիստ է զգում, երբ ոտքը դնում է "ներաձուրիների" "Ջուզեպպե Մեացցա" մարզադաշտի խոտածածկին: Իտալական հեղինակավոր Football Italia ռադիոկայանը մեջբերում է Սնեյդերի խոսքերը. "Եթե ակումբի ղեկավարները որոշում կայացնեն ինձ վաճառելու մասին, ապա թող ամեն ինչ լինի այնպես, ինչպես նրանք են ցանկանում: Այդ դեպքում ես մեծ հիասթափություն կապրեմ, քանի որ ես շատ եմ ցանկանում մնալ "Ինտերում": Ամեն դեպքում, եթե ես ստիպված լինեմ հեռանալ "Ինտերից", ապա երևի երկար ժամանակ չեմ մոռանա բոլոր խաղընկերներիս: Հասկանում եմ, որ ֆուտբոլը մեծ զոհողություններ է պահանջում: Հիշում եմ, երբ տեղափոխվեցի "Ինտեր", ցանկանում էի մնալ "Ռեալում", սակայն ամեն ինչ փոխվեց ընդհամենը 10 րոպեի ընթացքում": |