16:06 Սուարեսը ոչ մի տեղ չի գնա "Լիվերպուլից" | |
 Մերսիսայդյան "Լիվերպուլի" ուրուգվայցի հայտնի հարձակվող Լուիս Սուարեսը երեկ նոր համաձայնագիր է կնքել անգլիական ակումբի ղեկավարության հետ` այդ կերպ լիովին վերջ տալով բոլոր այն սուտ ասեկոսեներին, թե իբր ինքը ցանկանում է հեռանալ "կարմիրների" շարքից: "Տարօրինակ ու հաճելի զգացումներ եմ ապրում այս պահին, քանի որ շատ ուրախ եմ, որ մնում եմ ակումբում: Ես հավանում եմ Լիվերպուլ քաղաքը: Տեղի երկրպագուները միշտ իմ կողքին են թե՛ դաշտում, թե՛ դրա սահմաններից դուրս, ինչը վերջին շրջանում ինձ համար հատկապես կարևոր էր: Կփորձեմ ամեն ինչ էլ անել, որպեսզի դաշտում ցույց տամ, թե ինչերի եմ ընդունակ: Ցանկանում եմ իմ բազմաթիվ գոլերով երախտապարտ լինել ակումբի նվիրյալ երկրպագուներին",- ասել է "Լիվերպուլի" ուրուգվայցի 25-ամյա առաջատար հարձակվողը, ում վերջերս ցանկանում էր գնել Թուրինի "Յուվենթուսը":Մերսիսայդյան ակումբի գլխավոր մարզիչ Բրենդան Ռոջերսն էլ այս կապակցությամբ հայտարարել է, որ անձամբ ինքը շատ ուրախ է, քանի որ ուրուգվայցի հարձակվողը շարունակելու է օգնել իրենց թիմին: "Նա աշխարհի լավագույն հարձակվողներից մեկն է: Հույս ունեմ, որ Սուարեսը կօգնի մեզ հասնելու մեր նպատակներին: Նա մեծ ցանկություն ունի կրկին կրելու "Լիվերպուլի" մարզաշապիկը, իսկ դա արդեն իսկ խոստումնալից է: Ես գոհ եմ, որ նման մակարդակի խաղացող կա թիմում, քանի որ Սուարեսն իսկական հաղթող է: Գիտեմ, որ ուրուգվայցին ցանկանում է հաղթանակների հասնել միայն "Լիվերպուլի" հետ, իսկ դա նշանակում է, որ նրան միշտ պետք է վստահել: Նա պատրաստ է դաշտ մտնել ցանկացած պահի ու օգնել մեզ ամեն հարցում",- ասել է "Լիվերպուլի" նորաթուխ գլխավոր մարզիչը` չմոռանալով անպայմանորեն նշել, որ այս ամռանը մի քանի հայտնի եվրոպական ակումբներ պաշտոնական առաջարկ էին արել ուրուգվայցուն գնելու վերաբերյալ, սակայն ինքը դեմ է եղել Սուարեսի վաճառքին, քանի որ լուրջ սպասելիքներ ունի նրանից: | |
|
| |
| Total comments: 0 | |