Կատալոնական "Բարսելոնայի" արդեն 30-ամյա հարձակվող Դավիդ Վիլյան էլ կտուգանվի Իսպանիայի "Լա Լիգայի" ղեկավարության կողմից երկրի առաջնության 1-ին տուրում "Ռեալ Սոսյեդադի" դարպասը խփած գոլը "սխալ ձևով" ու "անօրինական կարգով" տոնելու համար: Տուգանքի գումարը կկազմի 2000-3000 եվրո: Համաձայն իսպանական "Պրիմերայի" կանոնադրության` առաջնության բոլոր ֆուտբոլիստները ոչ մի իրավունք չունեն ցուցադրել որևէ կարգախոս կրող մարզաշապիկ:

   Հիշեցնենք, որ խփած գոլից հետո Դավիդ Վիլյան հանել էր խաղային մարզաշապիկը՝ ցուցադրելով երկրորդը, որի վրա պատկերված էր հարազատների նկարն ու մի գրություն. "Առանց Ձեզ սա հնարավոր չէր լինի": "Ռեալ Սոսյեդադի" հետ հանդիպումն առաջինն էր Վիլյայի համար վերջին 9 ամիսների ընթացքում. հարձակվողը երկար ժամանակ վերականգնվում էր ստացած ոտքի ծանր կոտրվածքից հետո: