07:21 Խոսափողի մոտ Մադրիդի "Ռեալի" գլխավոր մարզիչն է | |
 Մադրիդի "Ռեալի" գլխավոր մարզիչ Ժոզե Մոուրինյոն շարունակում է մնալ եվրոպական մարզական մամուլի ուշադրության կենտրոնում: Երեկ պորտուգալացին խոսել էր բազմաթիվ ֆուտբոլային խնդիրների մասին, որոնք լայնորեն լուսաբանվել են ողջ աշխարհով մեկ: "Յուրահատուկը" անկեղծորեն նշել է, որ ինքը դեռ որևէ խնդիր չունի կատալոնական "Բարսելոնայի" նորաթուխ գլխավոր մարզիչ Տիտո Վիլանովայի հետ, ավելի շուտ դեմ է, որ "կապտանռնագույնների" առաջատար Լեո Մեսսին արժանանա "Ոսկե գնդակ" մրցանակին: "Ժամանակին ես չպետք է կոնֆլիկտի գնայի Վիլանովայի հետ: Բայց այդ ժամանակ ես ուղղակի կորցրի ինքնատիրապետումս: Ընդհանրապես ես աշխատում եմ ֆուտբոլիստների հետ, կառավարում եմ իմ էմոցիաները և մտածում եմ միայն բուն խաղի մասին: Մեր միջև այսօր ոչ մի կոնֆլիկտ էլ չկա: Այդ չարաբաստիկ պատահարից հետո մենք անգամ հանդիպել ենք իրար, միմյանց ձեռք սեղմել: Այդ պատահարն արդեն մոռացվել է: Ինչ վերաբերում է "Ոսկե գնդակ" մրցանակին, ապա Մեսսին չպետք է այն ստանա, քանի որ 2 տարի առաջ իմ թիմի խաղացող Ռոնալդուն ավելի շատ գոլեր էր խփել, քան արգենտինացին և արժանացել էր Արքայական գավաթին, սակայն նրան չտվեցին այդ պարգևը: Եթե այս անգամ էլ արգենտինացին ստանա մրցանակը, ապա ֆուտբոլն այլևս թիմային խաղ չի կարելի համարել: Այն կկորցնի իր իրական դեմքը",- ասել է պորտուգալացի մասնագետը:Անդրադառնալով իտալական "Միլանի" դեմ խաղում 5-1 հաշվով տոնած հաղթանակին, "Յուրահատուկը" հավելել է, որ ընկերական խաղերն իր համար զուտ մարզումային գործընթացի մի մասն են կազմում: "Թիմը խաղաց շատ միասնական ֆուտբոլ: Խաղացողները նպատակաուղղված էին դեպի մրցակցի դարպասը: Եթե այսպես հաջող շարունակենք, ապա առաջնությանը կմոտենանք շատ լավ մարզավիճակում: "Ռեալը" մեծագույն թիմ է: Այստեղ ձգտում են հաղթել ցանկացած խաղում, կապ չունի, թե խաղն ինչ բնույթ է կրում: Նույնիսկ ընկերական խաղերում տոնած հաղթանակը շատ մեծ ոգևորություն է առաջացնում թիմի միլիոնավոր երկրպագուների մոտ: Ուրախ եմ, որ հատկապես Կական կարողացավ լավ փոխարինման մտնել ու 2 գոլային փոխանցում կատարել: Ինչ վերաբերում է այս Իսպանիայի Սուպերգավաթին, ապա կարծում եմ, որ ավելի կարևոր խաղեր կան, քան այդ երկու մենամարտը "Բարսելոնայի" հետ: Անցած տարի մենք չնվաճեցինք այդ մրցանակը, թեկուզ հետո հաղթեցինք առաջնությունում: Այդ խաղը չպետք է ազդի մրցաշրջանի հետագա ընթացքի վրա: Իհարկե, ցանկություն կա հաղթելու նաև այդ մրցանակը",- ասել է Ժոզե Մոուրինյոն, ում թիմը օգոստոսի 23-ին և 29-ին Իսպանիայի Սուպերգավաթի խաղարկության շրջանակներում կմրցի գլխավոր ախոյանի` կատալոնական ակումբի հետ: Հերթական անգամ էլ անդրադառնալով Իսպանիայի Սուպերգավաթի 2011թ.-ի խաղարկությանը` պորտուգալացի մասնագետը նշել է, որ սխալ է վարվել, երբ մատը մտցրել է մրցակցի մարզիչ Տիտո Վիլանովայի աչքի մեջ: "Դա ուղղակի պահի ազդեցություն էր, սակայն միևնույն է ես չպետք է այդ կերպ վարվեի: Այդ դրվագում միակ մեղավորը ես էի, այլ ոչ թե Վիլանովան: Հուսով եմ, որ նման բան այլևս չի կրկնվի իմ մարզչական կարիերայում, քանի որ դա ուղղակի մեծ սխալ է",- եզրափակել է իր մամուլի ասուլիսը Ժոզե Մոուրինյոն:
| |
|
| |
| Total comments: 0 | |