 Օրերս ՀՖՖ տեխնիկական կենտրոնում` Ավանի ֆուտբոլի ակադեմիայում տեղի է ունեցել սեմինար-հանդիպում` նվիրված ՀՖՖ ակումբների արտոնագրման համակարգին: Այս սեմինարը կազմակերպել էր ՀՖՖ Արտոնագրման բաժինը Հայաստանի բարձրագույն խմբի առաջնության մասնակից ակումբների համար: Այդ սեմինարն անցկացրել է ՈՒԵՖԱ-ի Ֆինանսական արդար խաղի պատասխանատու Ֆիլիպ Ռասմուսենը: Ինչպես հայտնում են ՀՖՖ մամուլի ծառայությունից, սեմինարի նպատակն էր մեր ակումբների գլխավոր քարտուղարներին և հաշվապահներին ծանոթացնել ՈՒԵՖԱ-ի ակումբների արտոնագրման համակարգին և ֆինանսական արդար խաղի վերջին նորամուծություններին և տենդենցներին, որոնք հիմնականում վերաբերում են բոլոր ակումբների արտոնագրման և ֆինանսական արդար խաղի 2012թ.-ի կանոնակարգում տեղ գտած բազում փոփոխություններին և արտոնագրման համակարգի ֆինանսական չափանիշի պահանջներին:
Մասնավորապես ներկայացվել է ֆինանսական արդար խաղի կիրառելիությունը և առկա պահանջները, որոնք ուժի մեջ են մտնելու գալիք 2013/14 մրցաշրջանում: Հանդիպման վերջում մեր ակումբների ներկայացուցիչներն հնարավորություն է տրվել հարցեր ուղղել Ռասմուսենին: Ծավալված բուռն և հետաքրքիր քննարկման արդյունքում շատերը ստացան իրենց հուզող հարցերի պատասխանները:
|