18:01 Մովսիսյանի դեբյուտը "Սպարտակի" կազմում նշանավորվեց հեթ-տրիկով | |
 Ռուսաստանի առաջնություն: "Պրեմիեր լիգա": 20-րդ տուր: Մոսկվայի "Սպարտակը" հանդիպում է Գրոզնիի "Թերեքին": Ձմեռային դադարից հետո այս թիմերի միջև մրցավեճն ավարտվում է մայրաքաղաքայինների հաղթանակով՝ 3-1 հաշվով: Հանդիպման ընթացքում երեք անգամ փայլեց մեր հավաքականի հարձակվող Յուրա Մովսիսյանը: Սակայն "Կարմրասպիտակների" գլխավոր մարզիչն այնքան էլ գոհ չէ թիմի ցուցադրած խաղից: Հետխաղյա մամուլի ասուլիսի ժամանակ Վալերի Կարպինը նշել է. "Առաջին խաղի համար, այն էլ՝ ոչ լավագույն խաղի, ամեն ինչի արդյունքում կարծես թե լավ է. հաղթեցինք 3-1 հաշվով: Տղաները գոհ են, բոլորին շնորհավորում եմ: Սակայն կան որոշ բաներ, որոնց վրա պետք է աշխատել: Այդպես միշտ է լինում: Մեկը վստահ էր խաղում, մեկը՝ անվստահ. չեմ կարող ասել, թե բոլորն անցկացրին իրենց լավագույն խաղը": Իսկ այն հարցին, թե ինչպես կգնահատի Մովսիսյանի փայլուն նորամուտը, մարզիչը պատասխանում է. - Մովսիսյանին հենց դրա համար էլ գնել ենք, որ փայլի: Բայց չեմ ցանկանում առանձնացնել կոնկրետ մեկին. այո՛, նա խփեց երեք գոլ, հրաշալի է, բայց կա թիմը, և ոչ թե միայն Մովսիսյանը: Ամբողջ թիմը լավ աշխատեց, և դրա արդյունքը գոլերի տեսքով քաղեց Մովսիսյանը: "Սպարտակի" կազմում առաջին պաշտոնական խաղն անցկացնող Մովսիսյանի նորամուտը նշանավորվեց ոչ միայն հեթ-տրիկով, այլև "Սպարտակի" պատմության մեջ արդեն առկա ռեկորդը թարմացնելով. 1996թ.-ին այդ թիմում իր նորամուտը նշող Կոստանտին Կովալենկոն գոլի հեղինակ էր դարձել խաղադաշտ դուրս գալուց 3 րոպե անց: Գոլ խփելու համար Մովսիսյանից այսօր պահանջվեց ընդամենը 2 րոպե: Հեղինակ՝ Հռիփսիմե Գալստյան
| |
|
| |
| Total comments: 0 | |