 Մադրիդի "Ռեալի" և Պորտուգալիայի ազգային հավաքականի առաջատար կիսապաշտպան-հարձակող Քրիշտիանու Ռոնալդուն երկու օր առաջ մեքսիկական "Չիվաս" ակումբի հետ կայացած ընկերական հանդիպման ավարտից հետո (Խմբ. նշենք, որ հանդիպումն ավարտվել է մադրիդցիների հաղթանակով 3-0 հաշվով, և այդ խաղում դասական հեթ-տրիկի հեղինակ է դարձել հենց Ռոնալդուն) նշել է, որ "Արքայական ակումբի" բոլոր նորեկները հիանալի ինտեգրվել են թիմում: Ինչպես հիշեցնում է soccer.ru ֆուտբոլային պորտալը, իսպանական ակումբի հետ արդեն պայմանագրեր են կնքել Նուրի Շահինը, Ֆաբիո Կոենտրաուն, Համիտ Ալթինթոփը և Խոսե Կալյեխոնը: Ռոնալդուն ասել է. "Բոլոր նորեկները զարմացնում են ինձ: Նրանք շատ լավն են: Մենք լավ ենք նախապատրաստվում և նոր մրցաշրջանը պետք է գերազանց մարզավիճակով մեկնարկենք": |