 Անգլիական "Արսենալի" գլխավոր մարզիչ Արսեն Վենգերն այսօր հայտարարել է, որ ֆուտբոլային հանդիպումներ հեռարձակող առաջատար հեռուստաընկերությունները ներկայումս շատ մեծ ազդեցություն ունեն ժամանակակից ֆուտբոլում, ինչը սխալ ու վտանգավոր երևույթ է: Ինչպես բրիտականական The Telegraph պարբերականի հետ զրույցում ասել է Վենգերն, այս քայլով անգլիական "Պրեմիեր լիգան" իր հոգին վաճառում է հեռուստաընկերություններին: "Մենք այլևս չենք զբաղվում մեր թիմերի խաղացանկերը որոշելով, այսինքն` ամեն բան հեռուստաընկերությունների ձեռքերում է հայտնվել: Չեմ կարող ասել, որ հեռուստատեսությունը վատ երևույթ է, սակայն այն չպետք է նման արտոնություններով խանգարի եվրոպական ակումբներին: Իհարկե, կախված հանդիպման ժամերից` թիմերի ստացած եկամուտները շատանում կամ գուցե նվազում են, ու այստեղ էլ շահում են ոչ բոլոր թիմերը, քանի որ որոշումները կայացնում է հեռուստաընկերությունը: Անգլիայում միշտ էլ դժվար է ճիշտ խոսելը, բայց հաստատ ես միակ մարզիչը չեմ, ում անհանգստացնում է այս երևույթը",-զայրացած նշել է ֆրանսիացի մարզիչը: |