20:46 Պարզվել է "Գանձասարի" հաջորդ մրցակիցը | |
Թուրքիայում ուսումնամարզական հավաք անցկացնող Կապանի "Գանձասարը" փետրվարի 16-ին ընկերական հանդիպում կանցկացնի Յարոսլավի "Շիննիկի" հետ, որը Ռուսաստանի նախորդ առաջնության առաջին խմբի մրցաշարում գրավել էր 10-րդ հորիզոնականը: Սա կլինի Թուրքիայում "Գանձասարի" երկրորդ ստուգողական հանդիպումը: Հիշեցնենք, որ առաջին մրցախաղում Աբրահամ Խաշմանյանի գլխավորած թիմը 4-0 հաշվով առավելության էր հասել Սամարայի "Կռիլյա Սովետովի" երիտասարդական թիմի նկատմամբ: Ինչպես ArmSport.am-ի հետ զրույցում նշեց թիմի գլխավոր մարզիչ Աբրահամ Խաշմանյանը, "Գանձասարը" այդ խաղում առավելություն ուներ, բայց ոչ այնպիսին, ինչն արտահայտվեց վերջնական հաշվում. "Այդ խաղում պարզապես մեր ֆուտբոլիստները խնամքով օգտագործեցին ընձեռված գոլային հնարավորությունները",-պարզաբանեց մարզիչը: Իսկ հանդիպմանը գոլերի հեղինակներ էին դարձել փորձառու հարձակվողներ Արթուր Քոչարյանը (դարձել է դուբլի հեղինակ), Արսեն Ավետիսյանը և այս տարի "Գանձասարի" շարքերը համալրած Սարգիս Մովսիսյանը: Նշենք, որ այժմ թիմի կազմում փորձաշրջան են անցնում արտասահմանցի 3 ֆուտբոլիստներ` 2 կամերունցի և մեկ մոլդովացի: Սպասվում է, որ վաղը թիմին կմիանա խորվաթ ևս մեկ խաղացող: Փետրվարի 16-ին կայանալիք ստուգողական հանդիպումից հետո պարզ կլինի, թե այս ֆուտբոլիստները կշարունակե՞ն արդյոք փորձաշրջանը և "Գանձասարի" հետ կուղևորվե՞ն Աշխաբադ, թե` ոչ: Հիշեցնենք, որ կապանյան թիմը Թուրքիայից փետրվարի 17-ին ուղևորվելու է Աշխաբադ` մասնակցելու Թուրքմենստանի "Նախագահի գավաթի" խաղարկությանը:
| |
|
| |
| Total comments: 0 | |