14:30 Պիկեն` ամեն ինչի մասին | |
Կատալոնական "Բարսելոնայի" կենտրևոնական պաշտպան Խերարդ Պիկեն Sports Illustrated ամսագրին տված հարցազրույցի ժամանակ խոսել է շատ բաների մասին, համեմատել Լիոնել
Մեսսիին ու Քրիշտիանու Ռոնալդուին, ինչպես նաև բացատրել է, թե որն է "Բարսելոնայի"
պատանեկան ակադեմիայի` աստղեր պատրաստելու հաջողության գաղտնիքը: -Դուք ծնվել եք Բարսելոնայում: Կարելի՞ է արդյոք ասել, որ Ձեր գալուստը կատալոնական ակումբ արդեն նախանշված էր Աստծու կողմից: -Անշուշտ, այդ հարցում մեծ դեր է
խաղացել իմ հայրական կողմի պապիկը: Ծննդյանս օրվանից նա ինձ մոտ սեր է սերմանել դեպի
ֆուտբոլ և դարձրել է ինձ "Բարսելոնայի" ամենամեծ երկրպագուն: Նա ինքը պատանի
տարիքից երկրպագել է "Բարսելոնային", իսկ ավելի ուշ դարձել է ակումբի
փոխնախագահը: Մայրս և հայրս ևս միշտ սատարել են "Բարսելոնային", և ես
պարզապես չէի կարող խուսափել այդ ընտանեկան ավանդույթից: -Ձեզ
անընդհատ համեմատում են համաշխարհային ֆուտբոլի լավագույն կենտրոնական պաշտպան Ֆրանց Բեկենբաուերի հետ, նույնիսկ ասում են` մականուն են
հորինել` "Պիկենբաուեր": Իսկ վերջերս Դուք անձամբ հանդիպե՞լ եք կայզերի հետ: -Ես գիտեմ, որ նա
հզոր մարդ է, և նրա հետ ծանոթանալը մեծ պատիվ կլիներր ինձ համար: Ցավոք, ես
երբեք չեմ տեսել նրան դաշտում, քանի որ այն ժամանակ դեռ չէի էլ ծնվել, բայց ես
դիտել եմ նրա խաղերի տեսագրությունները: Մեր խաղաոճերը նման են, բայց նա
շատ ավելի տաղանդավոր է եղել: Ես դեռ շատ պետք է սովորեմ` նման բարձր մակարդակի
հասնելու համար: Նա երկու անգամ "Ոսկե գնդակի" է արժանացել, հաղթել է
1974թ. աշխարհի առաջնությունը և բազում այլ հաղթանակներ նվաճել:
Բեկենբաուերը ՖԻՖԱ-ի պատմության մեջ լավագույն ֆուտբոլիստներից մեկն է: Այնպես
որ, կարծում եմ, դեռ վաղ է ինձ "Պիկենբաուեր" կոչել (ժպտում է): -Այս տարի "Ոսկե գնդակի" բոլոր երեք հավակնորդները ձեր "Բարսելոնայից" էին: Ո ՞րն է "Լա Մասիա"` ակումբի պատանեկան ակադե- միայի հաջողության գաղտնիքը և գրավականը: -Այնտեղ
սովորեցնում են ամենակարևոր բաները. ինչպես վերահսկել գնդակը, ինչպես
կատարել կարճ և երկար ճշգրիտ փոխանցումներ: Հիշում եմ, երբ մենք դեռ երեխա էինք,
խաղում էինք այլ կատալոնական ակումբների դեմ փորձ ձեռք բերելու համար:
Արդյունքը մեզ համար միշտ կարևոր չէր: Մեր գլխավոր նպատակն էր զարգանալ
տեխնիկապես, քանի որ միայն "ֆիզիկականով" ոչնչի չես հասնի: Իսկ հենց նույն "Էսպանյոլում" մեծ ուշադրություն էր դարձվում ֆիզիկական պատրաստվածությանը:
Մեսսին, Ինյեստան, Չավին տեխնիկապես հիանալի են գործում, թեև ֆիզիկապես
այդքան էլ ուժեղ չեն: -Դատելով ձեր Twitter-ի էջից` կարելի
է ասել, որ Դուք մեծ կատակասեր եք: Իսկ ո՞վ է ձեր կարծիքով "Բարսելոնայի" հանդերձարանի ամենակատակասեր ֆուտբոլիստը: -Նրանք
երկուսն են` Դանի Ալվեշը և Մեսսին, թեև նրանց հումորը շատ տարբեր է:
Ալվեշն ավելի երաժշտական է, սիրում է պարել, զվարճացնել, իսկ Մեսսին ավելի
շատ խոսքի վարպետ է: Հենց նրանց ենք մենք պարտական այն հիանալի մթնոլորտի
համար, որ տիրում է մեր թիմում, վստահ եմ, որ դա փոխանցվում է նաև մեր
երկրպագուներին: Եթե ֆուտբոլիստների միջև չկա համերաշխություն և
փոխհամաձայնություն, նրանք խաղադաշտում հաջողության չեն հասնի: -Դուք
հսկում եք Մեսսիին մարզումների ժամանակ և Քրիշտիանու Ռոնալդուին` "Ռեալի"
հետ հանդիպումների ժամանակ: Ու՞մ է ավելի բարդ կանգնեցնել: -Կարծում եմ` այդ երկուսը ներկա պահին աշխարհի լավագույն ֆուտբոլիստներն են: Բայց նրանց խաղաոճերը բոլորովին նման չեն: Լեոն ավելի վճռական է: Գնդակը ստանալուց հետո նա միայն մտածում է այն դարպասը ուղարկելու մասին: Քրիշտիանուն ավելի շատ սիրում է աշխատել հանրության համար: Բայց կանգնեցնել նրան ամենևին էլ հեշտ չէ: Երբ խաղում ես Ռոնալդուի հետ, պետք է ամբողջությամբ կենտրոնանաս գնդակի վրա, եթե նույնիսկ մեկ վայրկյանով գնդակը կորչի աչքիցդ, Ռոնալդուին ևս կկորցնես: Պետք է փորձես նրանից արագ լինել, իսկ դա միշտ չի հաջողվում, բայց երբեմն հնարավոր է: -"Բարսելոնայում" Ձեզ ավելի շատ են թույլ տալիս մասնակցել գրոհներին, քան այլ ակումբների կենտրոնական պաշտպաններին: Ինչու՞:
-Դա երևի բխում է մեր թիմի հատուկ ու հստակ խաղաոճից: Բացի դրանից, այսօր կենտրոնական պաշտպանները հիմնականում տարիքով փոքր են լինում: Միգուցե հենց այդ պատճառով ֆիզիկապես նրանք ավելի լավ են գործում, քան տակտիկապես: Այստեղ խոսում է փորձի պակասը: Ժամանակի հետ դու սովորում ես վերահսկել գնդակը, քեզ հետաքրքիր է դառնում պոկվել պաշտպանությունից և նույնիսկ գոլ խփել: Ես արդեն փորձում եմ երբեմն անել դա: | |
|
Total comments: 0 | |